用到花兒也謝了既產品
每次買完D野番黎試，然後將佢影靚靚，諗住好用就用下POST。但發覺每次都總有一堆用完之後真係唔係幾岩自己用，所以都唔會POST上黎用「明明麵包乾到硬左都硬係要說成麵包很脆」既理論咁SELL出去…
入番正題，我真係好鐘意買頭髮護理產品，因為成日出去都好羨慕有D女仔D頭髮靚到反曬光。而自己果把頭髮經過一輪電染已經變得又傷又乾…呢3樣係上個月入手，但試完又試都真係唔滿意既頭髮產品～～
1.
Klorane維他命B防脫洗髮水
Klorane應該都唔少人聽過，主打天然植物護髮既法國藥妝牌子黎，價錢就比Rene Furterer平少少。佢D護髮產品都係不含矽靈，唔會阻塞毛孔，對頭皮都健康D。
呢款係含有豐富維他B可以增強頭皮健康同減少脫髮。佢聞上去都有幾重既薰衣草香，同埋佢質地都幾稀唔算杰身。一般無矽靈既洗頭水起泡力都唔算強，所以如果要強大既泡泡就要給點力去起泡。呢款洗落好在洗都唔算乾，洗完個頭都有淡淡花香味同埋頭皮都有清爽既感覺。但呢款我用完第2朝起身個頭比平時快變得油，頭皮出油快左好多…一油頭就開始臭。。。。。無矽靈洗頭水我都用過好幾款，呢款我用完真係出油情況算嚴重。好勉強用左半枝，亦唔太覺脫髮減少。所以，而家用黎洗掃算～～
2. Nuxe Gentle Shampoo 蜂蜜修護洗髮露
買佢真係完完全全因為我真係好鐘意佢款蜜糖洗面陣蜜糖香味，真係好香好香好香～～～呢款都係有蜜糖味架！！！呢款都係不含矽靈～～呢款幾容易起到泡泡，同埋洗完都覺得幾保濕！但又未保濕到可以SKIP左護髮素。用完感覺上頭髮係比較貼服。但我用完又係有個問題，就係第2朝頭髮好快出油…一遇到用完洗頭水第2朝快左出油的話，我都選擇堅持再用一排睇睇係咪純粹調理緊頭皮。不過用完都係咁，唯有放埋一邊比另一半搞掂佢。
3. Rene
Furterer Natura Dry shampoo
呢款Dry shampoo比較特別，就係佢噴出黎既粉末係栗色而唔係白色。噴到頭皮到好似無白色粉末即使噴唔勻都無咁顯眼。佢係可以吸走皮脂污垢，去除油味，但比我平時用既dry shampoo佢唔算係吸得超級乾爽。用完可能3／4粒鐘之後頭就開始出油，呢款我覺得唔係幾岩混合性／油性／中性既髮質用。
我髮質屬於中性，人人髮質唔同，所以上面都係作參考好了。如果你係中性髮質，又想搵款無矽靈既洗頭水，不妨試下圖4)Rene Furterer款Initia Softeninig Shine Shampoo！（都係無矽靈）洗完沖乾淨D頭髮係即時柔軟，你係摸到D頭髮即時變柔軟左。多數shampoo用完係會有順滑效果，但有明顯既柔軟效果我又諗唔出邊幾款！呢款標明係特別加入左B5，而B5可以增進頭髮健康，令頭髮強韌，滋潤同增加彈性。呢枝值得推介，因為佢可以令頭髮變得柔軟，但又有足夠保濕度，用完頭髮真係睇落好左。
平時可能大家買開架既洗頭水都加入左矽靈，用左加入左矽靈既洗頭水都會睇同摸落去比較順滑同有光澤。但如果沖唔乾淨甚至用D非水溶性矽既洗髮產品，D物質殘留左起頭皮表面會令毛孔堵塞，令頭髮缺營養最後造成無彈性易斷既情況。所以揀洗頭水時可以選擇下無加入矽靈既啊！
